1

وزارت داخلہ نواز شریف کے خلاف آرٹیکل 6 کے تحت انکوائری کرے: خرم نواز گنڈا پور

انکوائری نہ کی گئی تو توہین عدالت کی درخواست دائر کر یں گے
نواز شریف پرغداری ثابت ہو چکی ، خرم نواز گنڈا پور کا وزرات داخلہ کو خط

 

 

 ممبئی حملوں کے متعلق نا اہل نواز شریف کا بیان،پاکستان سے بھارت دہشتگرد بھیجنے کا الزام مادر وطن سے کھلی غداری ہے۔نواز شریف ملک سے غداری کے مرتکب ہوئے،اس حوالے سے سیکرٹری جنرل عوامی تحریک خرم نواز گنڈا پور نے لاہور ہائیکورٹ میں رٹ دائر کر رکھی تھی،خرم نواز گنڈا پور کی طرف سے رٹ ان کے وکیل اشتیاق چوہدری ایڈووکیٹ نے دائر کی،خرم نواز گنڈا پور کی درخواست پرلاہور ہائیکورٹ نے وزارت داخلہ کو 13مئی 2018 کو حکم جاری کیا تھا کہ وہ آرٹیکل 6 کے تحت نواز شریف کے خلاف کارروائی کرنے کا فیصلہ کریں۔لاہور ہائیکورٹ نے اپنے حکم میں یہ بھی احکامات جاری کئے کہ اس بابت وزارت داخلہ درخواست گزار خرم نواز گنڈا پور کو بھی آگاہ کرے،ابھی تک وزارت داخلہ نے لاہور ہائیکورٹ کے اس حکم پر کوئی رسپانس نہیں دیا ہے۔عدالت عالیہ کے احکامات کی روشنی میں خرم نواز گنڈا پور نے آج وزارت داخلہ کو خط لکھا ہے کہ وزارت داخلہ نواز شریف کے خلاف فوری طور پر آرٹیکل 6 کے تحت انکوائری کا آغاز کرے،بصورت دیگر توہین عدالت کی درخواست دائر کریں گے ۔خرم نواز گنڈا پور نے وزارت داخلہ کے نام اپنے خط میں یہ بھی لکھا ہے کہ نا اہل نواز شریف کا نیشنل سیکیورٹی کونسل کے اعلامیہ کو رد کرنا بھی ملک سے غداری ہے ان کے اس عمل سے بھی ان پر ملک سے غداری ثابت ہو چکی ہے۔ دریں اثناء خرم نواز گنڈا پور نے عوامی لائرز ونگ کے رہنماؤں سے گفتگو کرتے ہوئے کہا کہ قوم سے وعدہ ہے کہ وقت کے میر جعفر اور میر صادق خاندان کو انکے انجام تک پہنچا کر دم لیں گے ،تین بار ملک کا وزیر اعظم رہنے والا نا اہل اور کرپٹ شخص پاکستان کے خلاف دشمن ملک کا سلطانی گواہ بن کر مادر وطن سے غداری کر رہا ہے۔انہوں نے کہا کہ عدالت عالیہ سے درخواست ہے کہ غدار وطن کو گردن سے پکڑ کر ایسی کڑی سزا دی جائے کہ یہ شخص دوسروں کیلئے نشان عبرت بن جائے۔انہوں نے کہا کہ غدار کو سزا مل گئی تو نا اہل کا ساتھ دینے والوں کی بھی آنکھیں کھل جائینگی۔عوامی تحریک غدار وطن کو سزا ملنے تک قانونی جنگ لڑے گی اور غیر ملکی قوتوں کے نمک خوار کو سزا دلوا کر رہے گی۔